សម្ដេចក្រឡាហោម ស ខេង ផ្ញើសារថ្វាយព្រះពរសម្តេចព្រះមហាក្សត្រី ក្នុងឱកាសនៃព្រះរាជពិធីបុណ្យចម្រើនព្រះជន្មរបស់សម្តេចព្រះមហាក្សត្រី

ភ្នំពេញ : ថ្ងៃទី១៧ ខែមិថុនា ឆ្នាំ២០២១   សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នាថ្ងៃទី១៦ ខែមិថុនា ឆ្នាំ២០២១នេះ បានផ្ញើសារថ្វាយព្រះពរសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គលក្នុងឱកាសនៃព្រះរាជពិធីបុណ្យចម្រើនព្រះជន្មរបស់សម្តេចព្រះមហាក្សត្រី ព្រះវររាជមាតាជាតិខ្មែរ គម្រប់៨៥ យាងចូល៨៦ ព្រះវស្សា នាទិវាដ៏នក្ខត្តឫក្ស នាថ្ងៃទី១៨ ខែមិថុនា ឆ្នាំ២០២១៕

សូមអានខ្លឹមសារនៃសារលិខិតថ្វាយព្រះពរ ដែលមានខ្លឹមសារទាំងស្រុងដូចខាងក្រោម៖

(សូមអានបន្ត)

ចិន បន្តរកឃើញ COVID-19 ៤៩ករណីថ្មី ក្នុងរបាយការណ៍ថ្ងៃចន្ទនេះ

(សៀងហៃ)៖ អាជ្ញាធរសុខាភិបាលចិន នៅថ្ងៃចន្ទ ទី១០ ខែសីហា ឆ្នាំ២០២០នេះ បានប្រកាសពីការរកឃើញករណីឆ្លង COVID-19 ថ្មីៗចំនួន៤៩ បន្ថែម កាលពីថ្ងៃអាទិត្យម្សិលមិញ។ នេះបើយោងតាមការចេញផ្សាយដោយទីភ្នាក់ងារព័ត៌មាន Reuters។

គណៈកម្មការជាតិសុខាភិបាលចិន បានឲ្យដឹងថា ក្នុងចំណោមអ្នកឆ្លងថ្មីៗខាងលើ មាន១៤ ជាករណីឆ្លងក្នុងស្រុក។ ចំណែកឯ ៣៥ករណីទៀតជាករណី នាំចូលពីបរទេស ហើយក្នុងនោះទៀតសោត មានអ្នកជំងឺ ៣១នាក់មិនមានរោគសញ្ញានោះទេ។

គួរបញ្ជាក់ថា មកទល់នឹងពេលនេះ ប្រទេសចិនមានអ្នកឆ្លង COVID-19 សរុប ៨៤,៦៦៨នាក់ ក្នុងនោះស្លាប់ ៤,៦៣៤នាក់ និង៧៩,២៣២នាក់ បានជាសះស្បើយឡើងវិញ៕

(សូមអានបន្ត)

ក្រុមហ៊ុន Herbalife Nutrition រៀបចំព្រឹត្តិការណ៍ជិះកង់សប្បុរសធម៌ «កង់មួយ កុមារមួយ» ដើម្បីប្រមូលថវិកា ជួយទ្រទ្រង់អាហារូបត្ថម្ភល្អដល់កុមារខ្វះខាត

(ភ្នំពេញ)៖ Herbalife Nutrition ដែលជាក្រុមហ៊ុនអាហារូបត្ថម្ភលំដាប់ពិភពលោកមួយ រួមជាមួយសមាជិកជាង១០០នាក់ បានរៀបចំព្រឹត្តិការណ៍ជិះកង់សប្បុរសធម៌ «កង់មួយ កុមារមួយ» ដើម្បីរៃអង្គាសថវិកាជួយដល់កុមារខ្វះខាតនៅក្នុងប្រទេសកម្ពុជា តាមរយៈកម្មវិធី Casa Herbalife Nutrition ដែលសហការជាដៃគូជាមួយមន្ទីរពេទ្យកុមារអង្គរ (AHC) និងអង្គការដើម្បីភាពញញឹមនៃកុមារ (PSE)។

លោកស្រី ឈុន ណៃឈីវ អគ្គនាយកក្រុមហ៊ុន Herbalife Nutrition Cambodia បានថ្លែងថា៖ “ខ្ញុំពិតជារីករាយដែលបានចូលរួមក្នុងព្រឹត្តិការណ៍ជិះកង់សប្បុរសធម៌ ជាមួយក្រុមថ្នាក់ដឹកនាំ បុគ្គលិក សមាជិក ក្រុមគ្រួសារ និងមិត្តភក្តិជាច្រើនទៀត។ ព្រឹត្តិការណ៍នេះ បង្ហាញឲ្យឃើញពីការយកចិត្តទុកដាក់របស់យើងទៅកាន់មនុស្សកាន់តែច្រើនឡើងៗ ក្នុងគោលបំណងលើកកម្ពស់ដល់អត្ថន័យ និងរបៀបនៃការរស់នៅប្រកបដោយសុខភាពល្អ និងផ្តល់ផលប្រយោជន៍ដល់សហគមន៍ តាមរយៈមូលនិធិដែលប្រមូលបានពីអ្នកចូលរួមទាំងអស់របស់យើងនៅថ្ងៃនេះ។ នេះគឺជាការជិះកង់ចម្ងាយ ២៦គីឡូម៉ែត្រពីរាជធានីភ្នំពេញទៅឃុំវិហារសួគ៌ ខេត្តកណ្តាល”។

Herbalife Nutrition គឺជាក្រុមហ៊ុនអាហារូបត្ថម្ភលំដាប់ពិភពលោកមួយ ដែលបានផ្លាស់ប្តូរជីវិតរបស់មនុស្សជាមួយនឹងផលិតផលអាហារូបត្ថម្ភដ៏អស្ចារ្យ និងជាឱកាសអាជីវកម្មសម្រាប់អ្នកចែកចាយឯករាជ្យរបស់ខ្លួនចាប់តាំងពីឆ្នាំ១៩៨០។ យើងផ្តល់គុណភាពខ្ពស់ ផលិតផលដែលមានលក្ខណៈវិទ្យាសាស្ត្រ ដែលបានលក់នៅក្នុងជាង ៩០ប្រទេស។ អ្នកចែកចាយឯករាជ្យ ផ្តល់ជូនការបង្រៀនមួយទល់មួយជាមួយសមាជិកឯករាជ្យ និងផ្តល់ការគាំទ្រសហគមន៍ ដោយបំផុសគំនិតអតិថិជនឲ្យប្រកាន់ខ្ជាប់របៀបរស់នៅសកម្ម និងមានសុខភាពល្អ។

តាមរយៈយុទ្ធនាការជាសកលរបស់ក្រុមហ៊ុនដើម្បីលុបបំបាត់បញ្ហាកង្វះខាតអាហាររូបត្ថម្ភ ហើយ Herbalife Nutrition ក៏បានប្តេជ្ញាចិត្តក្នុងការនាំយកអាហារូបត្ថម្ភ និងការអប់រំដល់សហគមន៍នៅជុំវិញពិភពលោក។

ថវិកាដែលបានប្រមូលតាមរយៈសកម្មភាពនេះនឹងត្រូវបរិច្ចាគទៅឱ្យអង្គការសប្បុរសធម៌ទាំងពីរ ដើម្បីជួយលើកកម្ពស់អាហារូបត្ថម្ភ និងការរស់នៅរបស់កុមារដែលខ្វះខាត៕

(សូមអានបន្ត)

UPDATE: មនុស្សស្លាប់កើនដល់៣០នាក់, ១២នាក់បាត់ខ្លួន ក្នុងគ្រោះទឹកជំនន់នៅកូរ៉េខាងត្បូង

(សេអ៊ូល)៖ អាជ្ញាធរកូរ៉េខាងត្បូង នៅថ្ងៃអាទិត្យនេះ បានឱ្យដឹងថា ចំនួនអ្នកស្លាប់ដោយសារទឹកជំនន់ និងបំណាក់ដី ដែលបង្កឡើងដោយភ្លៀងធ្លាក់ខ្លាំង គិតចាប់តាំង ពីថ្ងៃសៅរ៍សប្ដាហ៍មុនមក គឺបានកើនដល់៣០នាក់ហើយ ខណៈ១២នាក់នៅបន្តបាត់ខ្លួន និង០៨នាក់ទៀតបានរងរបួស។ នេះបើតាមការចេញផ្សាយដោយទីភ្នាក់ងារ ព័ត៌មានចិនស៊ីនហួរ នៅថ្ងៃអាទិត្យ ទី០៩ ខែសីហា ឆ្នាំ២០២០។

មកទល់នឹងពេលនេះ ធ្លាក់ភ្លៀងយ៉ាងជោគជាំ បានបន្តរីកដាលដាលពីភាគកណ្តាលប្រទេសកូរ៉េខាងត្បូង រួមមានទាំងទីក្រុងសេអ៊ូល និងទីក្រុងធំៗដែលនៅជុំវិញនោះ ទៅដល់តំបន់ភាគខាងត្បូងប្រទេសបន្ថែមទៀត។

បើតាមអាជ្ញាធរកូរ៉េខាងត្បូង ប្រជាជនសរុបកើនដល់ ៥,៩៧១នាក់ ដែលមកពី៣,៤៨៩គ្រួសារ ត្រូវបានបង្ខំឲ្យជម្លៀសចេញពីលំនៅឋាន ទូទាំងប្រទេសកូរ៉េខាងត្បូង ហើយក្នុងចំណោមនោះ មនុស្ស ៤,៦១៧នាក់ មិនទាន់អាចត្រឡប់ទៅផ្ទះពួកគេវិញបាននៅឡើយទេ។ រីឯ ផ្ទៃដីកសិកម្ម ៩,៣០០ហិកតា ត្រូវបានជន់លិច ខណៈ ទ្រព្យសម្បតិ្តដែលត្រូវបានខូចខាតមានចំនួន ៩,៤៩១ករណី ដែលក្នុងនោះមានទ្រព្យសម្បតិ្តឯកជនចំនួន ៤,២៣៤ករណី និងទ្រព្យសម្បតិ្តសាធារណៈចំនួន ៥,២៥៧ករណី។

ទន្ទឹមនឹងនេះដែរ ផ្ទះសម្បែង ជម្រកសត្វ កន្លែងស្តុកទំនិញ និងរោងចក្រជាដើម ក៏ត្រូវបានជន់លិច ខណៈដែលផ្លូវថ្នល់ ផ្លូវដែក ស្ពាន និងអាងស្តុកទឹក បានរងការខូចខាត។ ប៉ុន្តែ ៧៣ភាគរយនៃទ្រព្យសម្បតិ្តដែលខូចខាតទាំងនោះ ត្រូវបានស្ដារឡើងវិញក្នុងលក្ខណៈបន្ទាន់ រួចហើយផងដែរ៕

(សូមអានបន្ត)

ពលរដ្ឋរងាយរគ្រោះ ១២៦គ្រួសារ នៅស្រុកថាឡាបរីវ៉ាត់ ខេត្តស្ទឹងត្រែង ទទួលអំណោយមនុស្សធម៌ពីកាកបាទក្រហមកម្ពុជា

(ស្ទឹងត្រែង)៖ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឱ្យលោកស្រី ពុំ ចន្ទីនី អគ្គលេខាធិការកាកបាទក្រហមកម្ពុជា និងលោក ម៉ុម សារឿន ប្រធានគណៈកម្មាធិការសាខាកាកបាទក្រហមកម្ពុជាខេត្តស្ទឹងត្រែង ព្រមទាំងថ្នាក់ដឹកនាំ-មន្ត្រីសាខាកាកបាទក្រហមកម្ពុជាខេត្តស្ទឹងត្រែង នាំយកអំណោយមនុស្សធម៌ផ្តល់ជូនប្រជាពលរដ្ឋ ១២៦គ្រួសារ ដែលរស់នៅស្រុកថាឡាបរីវ៉ាត់ ខេត្តស្ទឹងត្រែង។

សកម្មភាពខាងនេះបានប្រព្រឹត្តទៅនាថ្ងៃទី០៨ ខែសីហា ឆ្នាំ២០២០ នៅក្នុងបរិវេណវត្តវេឡុវ័ន ភូមិស្រែឫស្សី ឃុំស្រៃឫស្សី ស្រុកថាឡាបរីវ៉ាត់ ខេត្តស្ទឹងត្រែង។

ក្នុងឱកាសជួបសំណេះសំណាលនោះ លោកស្រីអគ្គលេខាធិការបានពាំនាំព្រះរាជបន្ទូលរបស់សម្តេចព្រះមហាក្សត្រិយ៍ ព្រះវររាជមាតាជាតិខ្មែរ មុនិនាថ សីហនុ ព្រះប្រធានកិត្តិយសកាកបាទក្រហមកម្ពុជា និងប្រសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បើទោះបីជាសម្តេចម៉ែ និងសម្តេចកិត្តិព្រឹទ្ធបណ្ឌិត មិនបានយាង-អញ្ជើញដោយផ្ទាល់ ក៏សម្តេចតែងតែមានមនោសញ្ចេតនានឹករលឹក អាណិតស្រឡាញ់ ការគិតគូរពីសុខទុក្ខ ជាពិសេសគឺជីវភាពរស់នៅប្រចាំថ្ងៃ និងសុខភាពរបស់ប្រជាពលរដ្ឋទាំងអស់គ្រប់ពេលវេលា។

ទន្ទឹមនឹងនេះ សម្តេចកិត្តិព្រឹទ្ធបណ្ឌិតបានចាត់ឱ្យមន្ត្រីក្រោមឱវាទចុះសួរសុខទុក្ខ ចែកអំណោយ និងពាំនាំនូវសារគន្លឹះស្តីពីបញ្ហាសុខភាព ជុំវិញការទប់ស្កាត់ជំងឺកូវីដ-១៩ និងការបង្ការជំងឺឆ្លងនានាដែលអាចកើតមាននៅក្នុងរដូវវស្សានេះ។

លោកស្រី ពុំ ចន្ទីនី បានអំពាវនាវដល់ប្រជាពលរដ្ឋមានស្មារតីប្រុងប្រយ័ត្នពីជំងឺគ្រុនឈាមនារដូវវស្សានេះ ជាពិសេសការកើតតឡើងវិញនូវជំងឺគ្រុនឈីក (CHIK) ខណៈជំងឺនេះបានរាលដាលដល់១៥ខេត្តហើយនៅក្នុងប្រទេសកម្ពុជា ដែលអាចជាបញ្ហាសុខភាពសាធាណៈមួយទៀត ដែលប្រឈមទៅនឹងហានិភ័យ ឆ្លងរាលដាលពីមនុស្សម្នាក់ទៅមនុស្សម្នាក់ទៀត តាមរយៈមូសខ្លាញី និងស្អាតបរិវេណជុំវិញផ្ទះ ដោយកំចាត់ចោលរាល់វត្ថុដែលអាចដក់ទឹកបាន ត្រូវដេកក្នុងមុងទាំងថ្ងៃ-យប់ ស្លៀកពាក់ខោអាវវែង មិនត្រូវអង្គុយ ឬសំរាកនៅកន្លែងដែលមិនមានពន្លឺគ្រប់គ្រាន់នោះទេ។ ក្នុងករណីក្រុមគ្រួសារណាម្នាក់ មានសញ្ញា ឬសញ្ញាជំងឺ ដូចជាក្ដៅខ្លួន (ក្ដៅខ្លួនខ្លាំងភ្លាមៗ ៣៩អង្សាសេឡើង) និងសញ្ញាបន្ទាប់បន្សុំផ្សេងទៀត ដូចជា មុខក្រហម ឈឺក្បាល ឈឺក្រោមក្រឡង់ភ្នែក ឈឺសាច់ដុំ ឬសន្លាក់ ឈឺខ្លួន ស្នាមកន្ទួលក្រហមជាដើម សូមយកពួកទៅមណ្ឌលសុខភាពដែលនៅជិតអ្នកបំផុត។

ជាមួយគ្នានេះ សូមស្ត្រីមានផ្ទៃពោះ អញ្ជើញទៅពិនិត្យផ្ទៃពោះឱ្យបានទៀងទាត់ទៅតាមកាលកំណត់របស់គ្រូពេទ្យ និងទៅសម្រាលកូននៅមន្ទីរពេទ្យ ឬមណ្ឌលសុខភាព ដើម្បីសុវត្ថិភាពទាំងម្តាយនិងកូន។ ចំពោះអ្នកមានកូនតូច សូមផ្តល់អាហារូបត្ថម្ភដល់កុមារឱ្យបានគ្រប់គ្រាន់។ បន្ថែមពីនេះ សូមប្រជាពលរដ្ឋចូលរួមអនុវត្តច្បាប់ចរាចរណ៍ឱ្យបានខ្ជាប់ខ្ជួន ដើម្បីសុវត្ថិភាពផ្ទាល់ខ្លួននិងអ្នកដទៃ ហើយក្រៅពីប្រកបរបរបង្កបង្កើនផល ត្រូវខិតខំចិញ្ចឹមសត្វ ដាំដំណាំជុំវិញផ្ទះ ដើម្បីជីវភាពគ្រួសារ និងរស់នៅជាមួយគ្នាដោយភាពសុខដុមនីយកម្មសាសនា ជាតិសាសន៍ ក្រោមម្លប់នៃសន្តិភាព។

សូមបញ្ជាក់ថា គ្រួសារនីមួយៗទទួលបានអង្ករ ៣០គីឡូក្រាម មី ១កេស ត្រីខ ១០កំប៉ុង ឃីត១ (មុង ភួយ សារុង ក្រមា អាវយឺត) សាប៊ូដុំ ២ដុំ និងបណ្ណប្រកាសស្តីពីវិធានការទប់ស្កាត់ការរីករាលដាលនៃជំងឺកូវីដ-១៩។ លោកស្រីអគ្គលេខាធិការ បានប្រគេនទេយ្យទាន និងថវិកាមួយចំនួនដល់ព្រសង្ឃវត្តវេឡុវ័នផងដែរ៕

(សូមអានបន្ត)

ពិធីក្រុងពាលីបញ្ចុះបឋមសិលាបើកការសាងសង់ស្តូបអនុស្សាវរីយ៍ រណសិរ្សសាមគ្គីសង្រ្គោះជាតិ២ធ្នូ ក្នុងក្រុងកំពង់ឆ្នាំង

(កំពង់ឆ្នាំង)៖ នាថ្ងៃទី៩ ខែសីហា ឆ្នាំ២០២០នេះ ខេត្តកំពង់ឆ្នាំងប្រារព្ធពិធីក្រុងពាលីបញ្ចុះបឋមសិលាបើកការសាងសង់ ស្តូបអនុស្សាវរីយ៍ រណសិរ្សសាមគ្គីសង្គ្រោះជាតិ២ធ្នូ នៅក្នុងបរិវេណមណ្ឌលកុមារកំព្រាខេត្តកំពង់ឆ្នាំង ក្រោមអធិបតីភាពលោក ឈួរ ច័ន្ទឌឿន អភិបាលខេត្ត និងលោកស្រី ដោយមានការអញ្ជើញចូលរួមពីលោក ផាន់ ចាន់ដារ៉ា សមាជិកក្រុមប្រឹក្សាខេត្ត លោក អភិបាលរងខេត្ត និង ប្រធានមន្ទីរ អង្គភាពជុំវិញខេត្ត រួមនិងអាជ្ញាក្រុងកំពង់ឆ្នាំងចូលរួមផងដែរ។

លោក ឈួរ ច័ន្ទឌឿន បានថ្លែងថា ការសាងសងស្តូបនេះឡើងក្នុងគោលបំណងដើម្បីរំលឹកគុណដល់អ្នកស្នេហាជាតិដែលបានពលីជីវិតក្នុងការតស៊ូរំដោះ ប្រទេសជាតិឱ្យរួចផុតពីរបបប្រល័យពូជសាសន៍ប៉ុលពត និងទុកជាទីតាំងប្រវត្តិសាស្រ្តសំរាប់កូនចៅជំនាន់ក្រោយបានសិក្សាបន្ថែម និងជារមណីដ្ឋានសំរាប់ប្រជាពលរដ្ឋខ្មែរដែលបានអញ្ជើញឆ្លងកាត់ខេត្តកំពង់ឆ្នាំង។

លោក ឈួរ ច័ន្ទឌឿន បានប្រសាន៍បន្តថាៈដោយបុព្វហេតុនៃការបង្កើតកំលាំងរណសិរ្សសាមគ្គីសង្រ្គោះជាតិ ២ឆ្នូនេះ ទើបធ្វើឱ្យប្រទេសកម្ពុជាមានសុខសន្តិភាពពេញបរិបូរណ៍ និងមានការអភិវឌ្ឍន៍ លើគ្រប់វិស័យក្នុងពេលបច្ចុប្បន្ន ក្រោមការដឹកនាំប្រកបដោយគតិបណ្ឌិតដ៏ថ្លៃថ្លា របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ៕

(សូមអានបន្ត)

រោងចក្រផលិតគ្រាប់ស្វាយចន្ទីថ្មីមួយលេចជារូបរាងនៅស្រុកកំពង់ស្វាយ ខេត្តកំពង់ធំ ផ្ដល់ក្ដីសង្ឃឹមធំធេងសម្រាប់ពលរដ្ឋមូលដ្ឋាន

(កំពង់ធំ)៖ ក្រសួងកសិកម្ម រុក្ខាប្រមាញ់ និងនេសាទ សហការជាមួយដៃគូពាក់ព័ន្ធ បានចំណាយលុយបង្កើតរោងចក្រកែច្នៃគ្រាប់ស្វាយចន្ទីខ្នាតមធ្យមថ្មីមួយទៀតនៅភូមិត្រពាំងអារក្ស ឃុំជ័យ ស្រុកកំពង់ស្វាយ ខេត្តកំពង់ធំ ដោយវាមានលទ្ធភាពបកគ្រាប់ស្រស់បានប្រមាណ ១០តោនក្នុងមួយថ្ងៃ និងអាចផលិតជាផលិតផលកែច្នៃរួចចាប់ពី ២-៣ តោនក្នុងមួយថ្ងៃ ផ្ដល់ក្ដីសង្ឃឹមខ្ពស់ដល់ប្រជាសហគមន៍នៅមូលដ្ឋាននោះជាច្រើនគ្រួសារ។

រោងចក្រនេះត្រូវបានបើកសម្ពោធជាផ្លូវការនាថ្ងៃទី៨ ខែសីហា ឆ្នាំ២០២០ ក្រោមវត្តមានលោក ហាស់ សិដ្ឋ អនុប្រធាននាយកដ្ឋានកសិឧស្សាហកម្ម នៃក្រសួងកសិកម្ម រុក្ខាប្រមាញ់ និងនេសាទ។ ការបង្កើតរោងចក្រនេះក៏មានការសហការពីសំណាក់អង្គការដៃគូអភិវឌ្ឍន៍ផងដែរ ស្របទៅនឹងយុទ្ធសាស្ត្ររបស់រាជរដ្ឋាភិបាល ដែលបានដាក់ចេញគោលការណ៍នាំចេញផលកសិកម្មឲ្យបាន ១២ភាគរយ នៃផលិតផលកែច្នៃក្នុងប្រទេស។

លោក ហាស់ ពិសិដ្ឋ បានឲ្យដឹងថា ការសាងសង់រោងចក្រកែច្នៃគ្រាប់ស្វាយចន្ទីខ្នាតមធ្យមនេះមានលទ្ធភាពផលិតក្នុងមួយថ្ងៃបាន ១០តោនគ្រាប់ស្រស់ ហើយអាចផលិតជាផលិតផលកែច្នៃរួចចាប់ពី ២-៣តោន ក្នុងនោះប្រើប្រាស់កម្លាំងពលកម្មប្រហែលជា ១០០នាក់។ តាមគោលការណ៍ គឺត្រូវផ្ដល់ការងារដល់ស្ត្រីនៅក្នុងមូលដ្ឋានឱ្យច្រើនបំផុត ដើម្បីបង្កើតការងារឲ្យស្ត្រីនៅក្នុងមូលដ្ឋាននេះ មានមុខរបរមួយ និងបង្កើនប្រាក់ចំណូលបន្ថែមទៀត ជៀសវាងការធ្វើចំណាកស្រុកទៅក្រៅប្រទេស។

លោកបានបន្តទៀតថា ការបង្កើតរោងចក្រនេះជួយដល់ប្រជាពលរដ្ឋ ដើម្បីប្រមូលផ្ដុំធ្វើកិច្ចសន្យាជាមួយក្រុមហ៊ុនគាត់នឹងដាក់លក្ខខណ្ឌ ដើម្បីទទួលបាននូវលទ្ធផលមួយថា «តើកសិករត្រូវធ្វើបែបណា ដើម្បីឱ្យពួកគាត់ប្រើប្រាស់យន្តការពាណិជ្ជកម្មកាន់តែប្រសើរ ទាំងតម្លៃ ទាំងគុណភាព មិនឲ្យពួកគាត់មានភាពប្រថុយប្រថានបានទៀតទេ»។

ជាមួយគ្នានេះដែរលោកស្រី អ៉ិន ឡៃហួត ប្រធានសហគមន៍ ក៏បានលើកឡើងដែរថា សិប្បកម្មកែច្នៃគ្រាប់ស្វាយចន្ទីជ័យសំបូរមានសមាជិកសហគមន៍ចំនួន ៣៣គ្រួសារ ដែលកំពុងដាំដុះលើផ្ទៃដី ៣៤៤ហិចតា។ នៅចំពោះមុខសមិទ្ធផលថ្មីនេះ ប្រជាពលរដ្ឋមូលដ្ឋានបានបង្ហាញភាពសប្បាយរីករាយជាខ្លាំង ជាមួយនឹងក្ដីសង្ឃឹមទទួលបានប្រាក់កម្រៃបន្ថែម សម្រាប់ផ្គត់ផ្គង់គ្រួសារកាត់បន្ថយការចំណាកស្រុក៕

(សូមអានបន្ត)

សម្តេចតេជោ ហ៊ុន សែន ផ្តល់អំណោយជូនជូនវីរនារីដោះមីន គង់ សារឿន នៅខេត្តស្វាយរៀង ដែលជួបបញ្ហាលំបាកក្នុងជីវភាព

(ស្វាយរៀង)៖ នៅព្រឹកថ្ងៃទី០៩ ខែសីហា ឆ្នាំ២០២០ ទេសរដ្ឋមន្ត្រី លីធុជ អនុប្រធានទី១ អាជ្ញាធរមីន បានចាត់លោក ស៊ុយ ជីហ៊ាង អគ្គលេខាធិការរងអាជ្ញាធរមីន ដឹកនាំក្រុមការងារ ចុះជួបសាកសួរសុខទុក្ខ ព្រមទាំងនាំយកអំណោយសម្តេចតេជោ ហ៊ុន សែន នាយករដ្ឋមន្ត្រី និងជាប្រធានអាជ្ញាធរមីន ជូនវីរនារីអង្គភាពដោះមីន ខេត្តស្វាយរៀងឈ្មោះ គង់ សារឿន អាយុ៦២ឆ្នាំ រស់នៅភូមិអូរក្អាម ឃុំសំបួរ ស្រុកស្វាយទាប ខេត្តស្វាយរៀង ដែលកំពុងមានជំងឺសម្រាកព្យាបាលនៅមន្ទីរពេទ្យបង្អែកស្រុកស្វាយទាប។

អ្នកស្រី គង់ សារឿន មានជំងឺស្ពឹកមួយចំហៀងខ្លួន ចំណែកលោក ភោគ សំអុល អាយុ៧០ឆ្នាំ ដែលជាស្វាមី មានជំងឺលើសឈាម ទឹកនោមផ្អែម បានមកសម្រាកព្យាបាលនៅមន្ទីរពេទ្យបង្អែក ស្រុកស្វាយទាបជាមួយគ្នា។

លោក ស៊ុយ ជីហ៊ាង ក្នុងនាមថ្នាក់ដឹកនាំអាជ្ញាធរមីន បានកោតសរសើរ និងថ្លែងអំណរគុណយ៉ាងជ្រាលជ្រៅជូនចំពោះលោកស្រី ដែលបានចូលរួមចំណែកយ៉ាងច្រើន ក្នុងការបោស សម្អាតមីននាពេលកន្លងមក ហើយលោក ស៊ុយ ជីហ៊ាង ក៏បានពាំនាំប្រសាសន៍ផ្តាំផ្ញើរសាកសួរសុខទុក្ខ នឹករលឹក និងសេចក្តីអាណិតអាសូពីសម្តេចតេជោនាយករដ្ឋមន្ត្រី និងថ្នាក់ដឹកនាំអាជ្ញាធរមីន ទាំងអស់ ដល់លោកស្រី គង់ សារឿន និងក្រុមគ្រួសារ ព្រមទាំងនាំយកអំណោយសម្តេចតេជោ ហ៊ុន សែន រួមមានគ្រឿងឧបភោគបរិភោគ សម្ភារប្រើប្រាស់ចាំបាច់ និងថវិកាមួយចំនួន ជូនលោកស្រីដើម្បីដោះស្រាយជីវភាពរស់នៅប្រចាំថ្ងៃ។

លោក ស៊ុយ ជីហ៊ាង ក៏បញ្ជាក់ថា អាជ្ញាធរមីន ដែលមានសម្តេចតេជោ ហ៊ុន សែន ជាប្រធាន មិនដែលភ្លេចពីវីរភាពរបស់ប្រតិបត្តិករដោះមីនណាម្នាក់ចោលឡើយ ទោះក្នុងកាលៈទេសៈណាក៏ដោយ។

លោកស្រី គង់ សារឿន បានលើកដៃប្រណមថ្លែងអំណរគុណដល់សម្តេចតេជោ ហ៊ុន សែន ដែលបានចាត់តំណាងចុះសួរសុខទុក្ខ និងផ្តល់អំណោយដល់លោកស្រី និងក្រុមគ្រួសារបានទាន់ពេលវេលា ដល់មន្ទីរពេទ្យ ហើយលោកស្រីសូមបួងសួងដល់វត្ថុស័ក្តសិទ្ធគ្រប់ទឹសទីក្នុងលោកតាមបីបាច់ថែរក្សាសម្តេចតេជោ និងសម្តេចកិត្តិព្រឹទ្ធបណ្ឌិត ព្រមទាំងក្រុមគ្រួសារ មានសុខភាពល្អ ប្រាជ្ញាវាងវៃ អាយុយឺនយួរ ដើម្បីបន្តដឹកនាំប្រទេសកម្ពុជា អោយរីកចម្រើនថែមទៀត។

លោកស្រី រៀបរាប់ថា ក្រោយថ្ងៃរំដោះ ៧ មករា ឆ្នាំ១៩៧៩ អ្នកស្រីបានស្ម័គ្រចិត្តចូលបម្រើការងារក្នុងអង្គភាពដោះមីនខេត្តស្វាយរៀង ហើយបានដោះមីនគ្រប់ប្រភេទ ដោះចម្រូង និងប្រមូលយុទ្ធភ័ណ្ឌមិនទាន់ផ្ទុះសម័យសង្គ្រាម ជារៀងរាល់ថ្ងៃ គ្មានថ្ងៃសម្រាកទេ គឺដោះមីនរយៈពេល១៣ឆ្នាំ រហូតដល់ឆ្នាំ១៩៩២។

គួរបញ្ជាក់ថា នៅឆ្នាំ២០០៤ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានសង់ផ្ទះឱ្យ១ខ្នង តាមរយៈលោកស្រីសង្គហបណ្ឌិត ម៉ែន សំអន ផងដែរ៕

(សូមអានបន្ត)